مصطلحات من السويداء

من طرف **suha abou hassoun** 27/9/2009, 17:59

مصطلحات من السويداء

هَيّب : جميل

جَوّد مليح : تمسّك جيداً

مِقيلز : فيه إرتفاع بسيط

عِميشي : و جبة عنصرها الرئيسي هو البرغل

شو باك مضبّع : ما بالك تمشي كالضبع

تتعوّاقش : لا تتأخر

شو بعلتك : ماذا دهاك

تِواخذ نيش : لا تعتب عليّ

عَبي تُوتن : إنه يدخّن

شَبقوا ع خُلقتوا : صفعه على وجهه

قعقور : حجارة توضع فوق بعضها بشكل عامودي

مِتقمّش : يلبس ثياباً من القماش

حَبلي : سورٌ غير مرتفع من الحجارة

مِزنقر : مكفهر الوجه وعابس

إنقرف : إنكسر

جَيازي : بالوعة المياه

قُوع : غطاء بالوعة المياه

قطّف : إسم علم مؤنث

فِرزان : إسم علم مذكر

يا نَشمي : يا بطل

الجَمشي : الحجر

زَقزوق : طريق ضيق

شِفعا : قطعة من الأرض

فقع : إنفجر

خَلقيني : طنجرة كبيرة

سِليقة : القمح المسلوق

حَربوق : ذكي يحسن التصرّف

طبك طبتك العافي : اي قمة الغباء

هَلّق : اللآن

أمساني: في ذلك الوقت

ما قِشعتوش : لم اراه

بَاكي : حظيرة الحيوانات

من طرف **أبو ابراهيم** 27/9/2009, 23:14

الله يعطيكي العافية أخت سها ذكرتيني بكلمات إلي سنين ما اسمعتا \ واسمحيلي بالمزيد منها

قر \ للتعجب أو للحسد

ما هرعوش \ ليس هنا

هرعو هون \ موجود هنا

محلس \ رقبته عريضة

متيس \ عنيد

معصمص \ نحيف

مدودخ \ مختل التوازن

مترمخ \ مسرور

بتون \ حذاء مغلق

شلوخ \ حذاء مفتوح

خفافي \ حذاء رياضي

صاكو \ جاكيت رجالي

دامر \ جاكيت نسائي

شوصة \ شارع

هوشة \ مشاجرة

من طرف **نبيل الجغامي** 28/9/2009, 07:24

والله يا اخت سهى موضوع كثير هيب

بعرفش شو بدي قلك بس يسلموا دياتك يختي

تحياتي

من طرف ???? 28/9/2009, 12:20

يختي سها ترجمي اذا فيكي
واحد راح على كرمو لاقا شب عبيسرقلو عنب اجا هذا الختيار ضرب الحرامي و عطبو راح الحرامي اشتكا للشرطة اجت الشرطة اخذت الختيار بس تحول على المحكمي وقف القاضي و حكم الختيار حكم ظالم اجا قلو الختيار
طبعا باللهجي الجبليي القديمي
قلو
حكمك قاسي يا قاضي و اني مظلوم .................. سمعني يا سيدي القاضي و بعدين حكوم
بدي احكيلك الحكاي من اولها ,.................. بحياتك لا تقطشني تكملها
مصيبتنا بهالولدي البعظ منها ............... بتستحيش من الشايب يا عيب الشوم
غريمي يلي قبالي مش من جيلي ................ عبيدعوس على شفافو مش قليلي
عملي حالو عنتر على قبيلي.................. لازملو فركة ذيني مع قصف خشوم
عندي شقفي بقميري مبيتها بور................ ديارة فيها رجمي بنصها قعقور
فيها طنعشر ديارة رزق الدبور................ بدها عزالي و تنكيش و تنقيب رجوم
فقت الدغشي تأمشي معش بكير ...............حملت غراظي و عفشي بظهر الحمير
طفاس بفظلو شهلني على التيسير ................. فوق الدابي عبنعس ما شبعتش نوم
الذاري صوب الطرعة بلش همير ............... لوتلك على خشبي بين الهشير
شلوحت عن الدابي بالتقادير............... حملت المساس و جيتك حاشك بجوم
لظمتلك لظ ملوج ورا البنوج................... كديتلك ما تخفش ذيبك بالهوج
قفز بوجه الدابي تنقز و تهوج.............. دق الداشر بالخاير وقع القدوم
شفتو انهزم سفقتو بكعب المساس .............. وادحم جب جحيمي مال الفطاس

راح مزقلب على بوزو مهشم الضراس ............. سفقتو لبطة ببطنو طار البتون
سيبتو و صرت شهل بالاوايل ................ بحيث اني على حالو ماني سائل
و جلست خرج الدابي بحيثو مايل .............. والعود يظهر على الخاير بعدو محزوم
على الشوصة لاند روفر شفتا من بعيد................. نزلولي سبع جنود و معهن بواريد
الاولاني صار ينادي عليي من بعيد................ وكلا وجوه و ما فيهن واحد مهظوم
طقو فيي من كواعي و قلولي ثبات............. اسا منبعثلك حدا يرد الطرشات
بيتوني بالمغفر اربع ليلات................ هذي القصة يا قاظي تفظل و حكوم

من طرف **هادية** 28/9/2009, 14:25

يعني بصراحة اختي سها موضوع حلو وحنون حنينا لكلام زمان

بس اخي معن على وطى برد
خلاني فز من مكان واضحك كتيررررررر

تقبلو ا مروري
هادية

من طرف **suha abou hassoun** 8/10/2009, 02:41

مهما رحنا ومهما جينا ...ومهما بحياتنا عِلينا ... ومهما مستقبلنا تفرفح، و شقلب هالعمر فينا..ما فينا إلا ما

نرجع لأصلنا وجذورنا ولكلماتنا الحلوة البسيطة والعفوية - عالبركة -

لأنو هذا بيدل على أصالتنا ووفاءنا للهجتنا المعروفية الأصيلة ...

شكرآ لمروركم ولإضافاتكم و خلفَ اللللللللللله عليكم يا ولاد وبنات عمي والله يديمكن ويديم أصالتكم

والضحكة ما تفارق خدودكن مثل ما أني ضحكت بهالصفحة الله بيعلم.....
.

من طرف ???? 10/10/2009, 03:19

سها يختي تذكرت شغلي
خشق القر بالقعقور اي
علق الضفدع بين كومة حجارة
تعشينا عسيسي و بتنا على سرا
اي تناولنا طعام العشاء من المربى و الطحينة و توجهنا الى الفراش باكرا
قر
اي يا للهول
وفي بعد كثير بس مو جايين على بالي

من طرف **فارس اليحموم** 10/10/2009, 17:18

الاخت سها مصطلحات هيبة كثير كثير
وعليها اضيف بعض المصطلحات

مغمقان \\\\\ وعاء مصنوع من القش
رجمة \\\\\\\\ كومة من الحجارة
بكيري \\\\\\\ تعني بكر البقرة
نبقلوا قر \\\\ تعني ضهور ورم في الجسد
ربدي \\\\\\\ حجر مستطيل الشكل
مطسس \\\\\\\ تعني اعمى
مترغل \\\\\\\ تعني مسرور جدا
مترمخ \\\\تعني مسرور جدا جدا جدا
متمسح \\\\ اشارة الى الغباء
مفرهد \\\\\ تعني بشوش الوجه
مطخ \\\\ تعني بركة الماء
هبدوا كف فكلوا نيعوا \\\ تعني صفعه على وجهه فخلع فكه
خشعة \\\\\ تلة صغيرة
ضاربك طساس العما \\\ تعني عدم التركيز
بقسي \\\\\ اسم علم مؤنث

مع الشكر لصاحبة الموضوع

من طرف **قمر الجبل** 10/10/2009, 20:13

والله يسلموا كثير حلوين وعجبوني

مع تحياتي

من طرف **suha abou hassoun** 18/10/2009, 01:40

َ هلا فيك أخي فارس ونورت الصفحة والله..بس هذي مغمقان و نبقلو قر من وين جبتن؟

..يعني غطوا ووطوا ..ولاّ

بقسي؟؟؟ شووو ؟ يا زين ما سمّوا والله...شكرآ لمرورك و لإضافتك هالكلمات و الضحك بعدو شغال أكيد..

قمر...كالعادة منورة الصفحة بطَلتك وإن ليّلت منعرف إنو عنّا قمر راح يرجع يضويها..شكرآ

من طرف **حسن القنطار** 18/10/2009, 03:16

والله يا اخت سهى كثير حلو هالموضوع واني والله متت من الضحك وخاصة علة نبقلو قر

مشكورين عاى هالمصطلحات الحلوي بس بدي اسال عن كلمي نحنا من وين جايبينا

بنبيجه ////اي مصاصة متي

مصطلحات من السويداء

مصطلحات من السويداء

رد: مصطلحات من السويداء

رد: مصطلحات من السويداء

رد: مصطلحات من السويداء

رد: مصطلحات من السويداء

رد: مصطلحات من السويداء

رد: مصطلحات من السويداء

رد: مصطلحات من السويداء

رد: مصطلحات من السويداء

رد: مصطلحات من السويداء

رد: مصطلحات من السويداء